Zavodumuzun əsası 1880 –ci ildə qoyulmuşdur. Müəssisəmiz uzun və şərəfli yol keçmişdir. Bu illər ərzində istehsal olunan məhsullar respublikamızda və dünyanın müxtəlif  ölkələrində neftçilər tərəfindən çox yüksək qiymətləndirilmişdir. 

   2010-cu il tarixdə “Səttərxan adına Maşınqayırma Zavodu”, “Bakı Maşınqayırma Zavodu”, “28 May adına Maşınqayırma Zavodu”  və “Bakı Neft-Mədən Maşınqayırma Zavodu” TASC-lərinin birləşməsi nəticəsində müasir avadanlıqlarla təchis olunmuş yeni “Bakı Neft Maşınqayırma Zavodu” TASC yaradılmışdır. “Bakı Neft Maşınqayırma Zavodu” TASC qısa müddət ərzində bütün aktivləri birləşdirməklə, hər dörd zavodda mövcud olmuş istehsal prosesini bərpa etməyə, sabit, dayanıqlı və keyfiyyətli məhsul istehsalını təmin etməyə nail olmuşdur. Bu istehsal prosesinin düzgün təşkili, əmək kollektivinin yüksək intizama, işgüzarlığa və məhsuldarlığa köklənmiş əhvali-ruhiyyəsi, mövcud istehsal parkından düzgün və səmərəli istifadə nəticəsində mümkün olmuşdur. Bu proses indi də davam edir. Belə ki, mənəvi və fiziki cəhətdən köhnəlmiş maşın, dəzgah və avadanlıqlar silinir və yeniləri ilə əvəz olunur, istehsal sahələrindən istifadənin səmərəliliyi araşdırılır, zavodun bugünkü profili ilə uyğun olmayan sahələrin təyinatının dəyişdirilməsi, istifadə perspektivi olmayan sahələrin müəyyən edilməsi istiqamətində işlər aparılır. 

   Qabaqcıl texnologiyadan istifadə edərək, zavodda istehsal olunan bütün avadanlıqlar köhnə modelləri təkmilləşdirərək, daha müasir tələblərə cavab verən, APİ və İSO standartlarına uyğun formada istehsal olunmaqdadır.

   Yuxarıda göstərilənləri nəzərə alaraq məlumat veririk ki, Mexaniki sexdə Tayvan istehsalı olan yeni, müxtəlif profilli dəzgahlar quraşdıdrılmışdır. Zavodun dəzgah parkında Almaniya istehsalı olan xüsusi yivaçan dəzgahlar, Böyük Britaniya istehsalı olan karusel dəzgahı, Yaponiya istehsalı olan içyonuş dəzgahı, Çin istehsalı olan torna, frez və burğu dəzgahları, dəmirçi sahəsində 1, 2, 3 və 5 tonluq pnevmotik çəkiclər (molot) quraşdırılmışdır. Müasir tələblərə uyğun tökmə sexi yaradılmışdır. Tökmə sexində Cənubi Koreya istehsalı olan 1 ədəd 2,5 tonluq , 2 ədəd 1,5 tonluq induksiya sobaları, 1 ədəd 2 tonluq Yaponiya istehsalı olan induksiya sobası və 1 ədəd 12 tonluq elektrik qövs sobası quraşdırılmışdır. Müasir tələblərə cavab verən 2000 atm. təzyiqə qədər yoxlamağa davamlı yeraltı və müxtəlif növ fırlanğıcların sınaq stendləri quraşdırılmışdır. Zavodun laboratoriyası Yapon istehsalı olan avadanliqla təchiz olunmuşdur.

   Bütün bu göstərilənlərin nəticəsidir ki, hal-hazırda zavodda 210, 350, 700, 1050 atmosfer təzyiqə davamlı avadanlıqlar istehsal olunur. 700, 1050 atmosfer təzyiqə davamlı avadanlıqlarımız “Ümüd” və “Bulla-Dəniz” yataqlarında, Ukrayna və Türkmənstan Respublikalarında hal-hazırda istifadə olunmaqdadır.

   Zavodda hal-hazırda 200 nəfər işçi çalışir. Əlavə olaraq 4 birləşmiş zavodlarda müxtəlif dövrlərdə əmək xəsarəti almış 250 nəfərə müavinət ödənilir.